இந்த நிதி நெருக்கடி வளரும் நாடுகளுக்கு மட்டுமல்ல; உலகப் பொருளாதாரத்தின் தூண்கள் என அழைக்கப்படும் நாடுகளை கூட சிரமப்படுத்தி வருகிறது. உலகின் மிகப்பெரிய பொருளாதார நாடாக இருந்தபோதிலும், உலகின் மிகப்பெரிய கடனாளியாக அமெரிக்கா முதலிடத்தில் உள்ளது. இது உலகின் மொத்த அரசாங்கக் கடனில் 34.5% பங்கைக் கொண்டுள்ளது.
2025-ம் ஆண்டின் அக்டோபர் மாத உலகப் பொருளாதாரக் கண்ணோட்ட அறிக்கையின்படி, அதிகரித்து வரும் அரசாங்கச் செலவுகள், விரிவான இராணுவ பட்ஜெட், சமூகப் பாதுகாப்புக் கடமைகள் மற்றும் பிற பொருளாதார அழுத்தங்கள் காரணமாக அமெரிக்க நாட்டின் கடன் அளவுகள் அதிகரித்துள்ளன. இந்த ஆண்டு இறுதிக்குள் மொத்த உலகளாவிய அரசாங்கக் கடன் $110.9 டிரில்லியனை எட்டும் என்று இந்த அறிக்கை மதிப்பிட்டுள்ளது.
பாகிஸ்தான், பங்களாதேஷ் அல்லது இலங்கை போன்ற வளரும் நாடுகள் தான் அதிக கடன் சுமைகளைச் சுமக்கின்றன என்று பலர் கருதும் நிலையில், உண்மை அதற்கு நேர்மாறாக உள்ளது.
உலகளாவிய அரசாங்கக் கடனில் 16.8%-னுடன், சீனா இந்தப் பட்டியலில் இரண்டாவது இடத்தில் உள்ளது. பெரிய அளவிலான உள்கட்டமைப்பு திட்டங்கள், சர்வதேச முதலீடுகள் மற்றும் உள்நாட்டு பொருளாதார கோரிக்கைகள் அதன் அதிகரித்து வரும் கடன்களுக்கு பங்களித்துள்ளன. இதன் காரணமாக நிதி ஸ்திரத்தன்மையை நிர்வகிப்பதில் பெய்ஜிங்கிற்கு பெரும் சவால் நிலவி வருகிறது.
உலகக் கடனில் 8.9% உடன் ஜப்பான் மூன்றாவது இடத்தில் உள்ளது. இந்நாட்டின் கடன்-மொத்த உள்நாட்டு உற்பத்தி விகிதம் கவலையளிப்பதாக உள்ளது. ஏனென்றால் இது 229.6 சதவிகிதமாக உள்ளது. அப்படியென்றால் டோக்கியோவின் கடன் அதன் பொருளாதாரத்தின் அளவை விட இரண்டு மடங்கு அதிகமாகும். பொருளாதார வல்லுநர்கள் இதை குறிப்பிடத்தக்க நிதி அபாயமாகக் கருதுகின்றனர்.
உலக அரசாங்கக் கடனில் 3.0% உடன் இந்தப் பட்டியலில் இந்தியா ஏழாவது இடத்தில் உள்ளது. இதன் கடன்-மொத்த உள்நாட்டு உற்பத்தி விகிதம் 81.4% ஆகும். இது அமெரிக்கா (125%) அல்லது இத்தாலி (136.8%) நாடுகளை விட மிகவும் குறைவு. இந்தியாவின் பொருளாதாரம் ஒப்பீட்டளவில் வலுவாக உள்ளது என்பதையும், கடன் அளவுகள் அவற்றை நிர்வகிக்கும் திறனுடன் உள்ளது என்பதையும் இது குறிக்கிறது.
சர்வதேச நாணய நிதியம் (IMF), உலக வங்கி, பிற இறையாண்மை கொண்ட நாடுகள், உலகளாவிய நிதி நிறுவனங்கள் மற்றும் சர்வதேச சந்தைகளில் வெளியிடப்படும் அரசாங்க பத்திரங்கள் உள்ளிட்ட பல்வேறு வழிகள் மூலம் நாடுகள் கடன் வாங்குகின்றன. வளர்ச்சி மற்றும் மேம்பாட்டிற்கு கடன் உத்வேகம் அளிக்கும் அதே வேளையில், அதிகப்படியான கடன் வாங்குதல் கடுமையான அபாயங்களை ஏற்படுத்துகிறது. இது வலுவான பொருளாதாரங்களைக் கூட சீர்குலைக்கும்.
பொருளாதார வல்லமை என்பது பலவீனமானது என்பதையும், உலகின் மிகவும் பிரபலமான பொருளாதார நாடுகள் கூட பெருகிவரும் கடனின் அழுத்தங்களுக்கு விதிவிலக்கல்ல என்பதையும் இந்த அறிக்கை நினைவூட்டுகிறது. வரும் ஆண்டுகளில் முன்னணி நாடுகளின் நிதி மூலோபாயம், பொருளாதாரக் கொள்கை மற்றும் நிதி ஸ்திரத்தன்மை குறித்த உலகளாவிய விவாதங்களை இது பாதிக்கும் என்றும் எதிர்பார்க்கப்படுகிறது.
November 27, 2025 8:48 PM IST
உலகிலேயே அதிக கடனில் உள்ள டாப் 7 நாடுகள் எவை தெரியுமா? முதலிடத்தில் இருக்கும் நாடு எதுன்னா தெரிஞ்சா ஷாக் ஆயுடுவீங்க
