ட்ரேட் முறையில் அதிரடி பேட்ஸ்மேனை வாங்கிய மும்பை அணி.. உற்சாகத்தில் ரசிகர்கள்.. | விளையாட்டு

ஐபிஎல் 2026 சீசனுக்கான மினி ஏலம் அடுத்த மாதம் டிசம்பர் 16, 2025 அன்று ஐக்கிய அரபு அமீரகத்தில் உள்ள அபுதாபியில் நடைபெறவுள்ளது. இது தொடர்ந்து மூன்றாவது ஆண்டாக வெளிநாட்டில் நடைபெறும் ஐபிஎல் ஏலமாகும். ஏலத்தில் பங்கேற்கும் உரிமையாளர்கள் அனைவரும், தங்களது அணியில் தக்கவைக்கப்படும் மற்றும் விடுவிக்கப்படும் வீரர்களின் இறுதிப் பட்டியலை நவம்பர் 15ஆம் தேதி மாலை 3 மணிக்குள் சமர்ப்பிக்க வேண்டும் என்று அறிவுறுத்தப்பட்டுள்ளனர்.

ஏலத்திற்கு முன்பான டிரேடிங் முறை தற்போது செயல்பட்டு வருகிறது. இதில், ஐபிஎல் வரலாற்றிலேயே மிகவும் முக்கியத்துவம் வாய்ந்த ஒரு டிரேடிங்கில், சென்னை சூப்பர் கிங்ஸ் (CSK) அணி ராஜஸ்தான் ராயல்ஸ் (RR) அணியிடமிருந்து விக்கெட் கீப்பர்-பேட்ஸ்மேனான சஞ்சு சாம்சனைப் பெற்றுள்ளதாக தகவல்கள் வெளிவந்துள்ளன.

இந்த நிலையில் வெஸ்ட் இண்டீஸ் அணியின் அதிரடி பேட்ஸ்மேனான ஷெர்ஃபேன் ரூதர்ஃபோர்ட், அடுத்த ஆண்டு நடைபெறவுள்ள ஐபிஎல் சீசனுக்காக குஜராத் டைட்டன்ஸ் அணியிலிருந்து மும்பை இந்தியன்ஸ் அணிக்கு டிரேட் (Trade) செய்யப்பட்டுள்ளார்.

ரூதர்ஃபோர்ட், குஜராத் டைட்டன்ஸ் அணியால் வாங்கப்பட்ட அதே விலையான ரூ. 2.60 கோடிக்கு மும்பை இந்தியன்ஸ் அணிக்கு மாற்றப்பட்டுள்ளார். இந்த டிரேட் ஒரு முழு பணப் பரிமாற்ற ஒப்பந்தமாகும்

27 வயதான இடது கை பேட்ஸ்மேனான ரூதர்ஃபோர்ட், குஜராத் டைட்டன்ஸ் அணிக்காக இந்த ஆண்டு 13 போட்டிகளில் விளையாடினார். அவர் 291 ரன்களைக் குவித்தார். இதில் அவரது ஸ்ட்ரைக் ரேட் மிகவும் ஈர்க்கக்கூடிய வகையில் 157.29 ஆக இருந்தது.

அவர் 2020ஆம் ஆண்டில் மும்பை இந்தியன்ஸ் அணியிலும், 2024ஆம் ஆண்டில் கொல்கத்தா நைட் ரைடர்ஸ் அணியிலும் இருந்தபோதிலும், அந்த சீசன்களில் விளையாடும் லெவனில் அவருக்கு வாய்ப்பு கிடைக்கவில்லை. இந்நிலையில் ரூதர்ஃபோர்டு நல்ல ஃபார்மில் இருப்பதால் அவரை ட்ரேட் செய்ததில் மும்பை அணியில் ரசிகர்கள் உற்சாகம் அடைந்துள்ளனர்.