சென்னை: சின்ன வெங்காயம் விலை சென்னையில் திடீரென உயர்ந்ததால் மக்கள் சிரமத்துக்கு ஆளாகியுள்ளனர். சென்னையில் கடந்த மாதம் பெரிய வெங்காய விலை அதிகமாகவும் சின்ன வெங்காய விலை குறைவாகவும் இருந்தது.
அண்மையில் பெய்த கனமழையால் தமிழகத்தில் பெரம்பலூர், திருப்பூர், திண்டுக்கல் மாவட்டங்களில் அதிகளவில் சாகுபடி செய்யப்பட்ட சின்ன வெங்காயம் அழுகியதால் விளைச்சல் பாதித்தது. அதனால் சந்தைக்கு வரத்து குறைந்தது. அதைத் தொடர்ந்து தற்போது விலை உயர்ந்து வருகிறது.சின்ன வெங்காயம் நேற்று கிலோவுக்கு ரூ.80 முதல் ரூ.100 வரை விற்றது.
இதுகுறித்து தோட்டக்கலைத் துறை அதிகாரிகள் கூறியதாவது: தமிழகத்துக்குத் தேவையான சின்ன வெங்காயம் நமது மாநிலத்திலேயே விளைகிறது. ஆண்டுதோறும் அக்டோபர், நவம்பர் மாதங்களில் சின்ன வெங்காயம் சாகுபடி நடைபெறும். டிசம்பர் முதல் மார்ச் வரை அறுவடை நடைபெறும்.
எந்த ஆண்டில் பருவமழை அதிகமாக இருக்கிறதோ அந்த ஆண்டு சின்ன வெங்காயம் அழுகல் அதிகம் ஏற்பட்டு, சந்தைக்கு வரத்து குறையும். அதனால் விலை உயர்வும் ஏற்படும். அதுபோலவே தற்போது சின்ன வெங்காய விலை உயர்ந்துள்ளது. அடுத்த 10 நாட்களில் சின்ன வெங்காயம் விலை குறையும். இவ்வாறு அவர்கள் தெரிவித்தனர்.
